निमगाव खैरी : शहीद भगतसिंग मित्र मंडळ व संघर्ष बहुउद्देशीय फाउंडेशन अंतर्गत संघर्ष वस्तीगृह यांच्या संयुक्त विद्यमाने गणेशोत्सव मोठ्या उत्साहात, आनंदी आणि भक्तिमय वातावरणात साजरा करण्यात आला. अकरा दिवस चाललेल्या या उत्सवामध्ये विविध मनोरंजनात्मक, सांस्कृतिक आणि क्रीडा उपक्रमांचे आयोजन करण्यात आले.
उत्सवाच्या काळात फनी गेम्स, मनोरंजनात्मक खेळ, सांस्कृतिक कार्यक्रम, डान्स स्पर्धा, गायन स्पर्धा आदी विविध उपक्रम घेण्यात आले. यामध्ये विशेषतः संघर्ष वस्तीगृहातील विद्यार्थी-विद्यार्थिनींचा मोठ्या संख्येने उत्स्फूर्त सहभाग राहिला. विद्यार्थ्यांना आपले कलागुण सादर करण्यासाठी व्यासपीठ मिळाले.
महिलांसाठीही विशेष मनोरंजनात्मक कार्यक्रम व विविध स्पर्धांचे आयोजन करण्यात आले. महिलांनी उत्स्फूर्तपणे सहभाग घेत कार्यक्रमाची रंगत वाढवली. सहभागी महिलांना प्रोत्साहन म्हणून साडी तसेच काही स्पर्धांमध्ये रोख स्वरूपातील बक्षिसे देण्यात आली. त्यामुळे महिलांमध्येही मोठा उत्साह पाहायला मिळाला.
या संपूर्ण उत्सवाच्या आयोजनामध्ये शहीद भगतसिंग मित्र मंडळाचे अध्यक्ष, उपाध्यक्ष व सर्व सदस्य, गल्लीतील युवक, महिला तसेच संघर्ष वस्तीगृहाचे अध्यक्ष, सचिव, शिक्षक आणि विद्यार्थी-विद्यार्थिनी यांनी विशेष परिश्रम घेतले.
ढोल-ताशांच्या गजरात भव्य विसर्जन मिरवणूक
गणेशोत्सवाच्या सांगता दिवशी गणरायाची वाजत-गाजत भव्य विसर्जन मिरवणूक काढण्यात आली. ढोल-ताशांचा गजर, फटाक्यांची आतषबाजी आणि पारंपरिक वाद्यांच्या तालावर निघालेल्या या मिरवणुकीमुळे संपूर्ण गावात उत्साहाचे वातावरण निर्माण झाले.
मिरवणुकीमध्ये गावातील नागरिक, युवक, महिला, विद्यार्थी-विद्यार्थिनी मोठ्या संख्येने सहभागी झाले. पारंपरिक वाद्यांच्या सादरीकरणाने मिरवणुकीची शोभा आणखी वाढली. विशेष म्हणजे संघर्ष वस्तीगृहातील विद्यार्थ्यांनीही पारंपरिक वाद्ये वाजविण्यात उत्स्फूर्त सहभाग घेतला. विद्यार्थ्यांच्या या सहभागाला गावकऱ्यांकडून उत्स्फूर्त प्रतिसाद मिळाला.
भक्ती, मनोरंजन, कला, संस्कृती आणि सामाजिक एकोप्याचा सुंदर संगम घडवून आणणारा हा गणेशोत्सव सर्वांच्या सहभागामुळे अविस्मरणीय ठरला. ‘गणेशोत्सव हा केवळ उत्सव नसून समाजातील सर्व घटकांना एकत्र आणणारा उत्सव आहे,’ असा संदेश या उपक्रमातून मिळाला.
Post a Comment
0 Comments